Offiziells Bryysdrummle und –pfyffe 2016


Scho kurz nach em Start ins neye Joor het vom 7. bis zem 9. Jänner 2016 s traditionelle Offizielle Bryysdrummle und – pfyffe stattgfunde. Ussergweenligg isch in däm Joor – näbscht em friehe Termin – au d’Daatsach gsy, ass s Offizielle syt langer Zyt wiider emool im Grossbasel duuregfiehrt worde isch – und zwaar im Casino. Trotz däm friehe Termin hän miir zwei muetigi Dambuure kaa, wo sich dääre Närvebroob gstellt hän. Dr Pascal Nippel (in dr Kategorie „Alti – Dambuure Einzel“) und dr Werner Zumsteg (Kategorie „Jungi – Dambuure – Einzel) hän sich e Härz gfasst und sin mit wild pochendem Härz uff d’Biini gstande. Fir e Finaliizuug het’s baidne laider nit (oder besser gsait – noonig) glängt. Mir freue uns aber scho jetz, ass sie au näggscht Joor wiider wärde uff dr Biini stoo und um e Finaliizuug wärde kämpfe!

Dr Pascal Nippel het mit eim Uffdritt nit gnueg kaa und het sich in dr Kategorie „Alti – Pfyffer-Einzel“ und in dr Kategorie „Solo Duo“ (dert het är denn wiider drummlet) noonemool uff d’Biini gwoggt. Au bi dääne baidne Uffdritt het‘s laider nit fir e Final glängt. Es isch aber au saumässig schweer, zue de beschte säggs im Saal z’gheere (bim Solo Duo sogar zue de beschte drey) und sich e Finalbilije z’ergattere. Huet ab vo dääre tolle Laischtig!

E härzliggi Gratulation an alli Dailnäämer! Es isch wirkligg nit eifach, voor däm fachkundige Publikum d’Närve kenne z’bhalte und Schlag um Schlag (Doon fir Doon) richtig z’setze! Die Jungs hän daas aber gschafft und miir kenne stolz uff se syy! Mir hoffe uff e Fortsetzig im Joor 2017! Machet wyter so!