Bummelbricht Strizzi 2016


Am Morge vom dritte Bummelsunntig hänn sich d Strizzi im Käller vo dr Innere Margarethe yygfunde. Nachdäm sich jede aagmolde hett und d Bummelabzeiche in Empfang gnoo worde sinn, hänn sich d Strizzi und alli Begleiter uffe Wääg gmacht. Z’fuess isch es Richtig Heuwoog gange und vo dört witer zum Zolli. Durch unseri Bummelabzeiche in Grubbe yydailt, hett jedi Grubbe e Poschtelauf ussdailt bikoo.

Und scho isch es los gange. Jedi Grubbe hett e paar Stund Zyt und ganz vill interessanti Frooge bikoo. So hänn d Strizzi zum Bispiil dörfe leere wieso d Flamingo nie ihre Schwarm vrlöön odr wie wit e Känguru mit eim Sprung ka springe.

Um d Mittagszyt hänn sich alli Grubbe wieder bim Yygang vom Zolli zämmegfunde mit allne beantwortete Frooge. Vo dört isch es witergange in e Restaurant an dr Heuwoog. Zwüsche feyne Spaghetti und Tiramiù hett dr Strizzi Obmaa no e super Reed ghalte und unter anderem d Strizzi-Blaggedde Vrkäuf bekannt gää. D Strizzi hänn wiedermol für e super Summe Blaggedde vor dr Fasnacht vrkauft – vyyle Dangg an däre Stell. Nach dr Rangvrkündigung vom vormidäägliche Boschtelauf im Zolli, hett’s au scho gli wieder gheisse “Yyystoo”. Punggt vieri sinn d Strizzi mitem 10. Väärs in dr Steine abgloffe und hänn e paar richtig schöni Rundene drait.

Uff die säggsi hetts im Käller Inneri Margarethe no e paar Hot Dogs zum zNacht gää. Nachem Uffwärme und dr Stergigg isch es wieder uff d Gass gange. Vom Käller uss sinn d Strizzi Richtig Theater und vo dört uss dr Steinebärg uffe und denn d Freye duurab. Bim offizielle Abträtte am achti uffem Barfi isch e Dail vo de Strizzi vo de Eltere abgholt worde und langsam heim Richtig Bett. Die Grössere hänn no e paar Ründeli drait und so die letschte Stunde vomene wunderschöne dritte Bummelsunntig könne gniesse. Nomoll härzligge Dangg an die überträttende Strizzi für s Organisiere vo däm tolle Bummel.