D’Faasnacht 2016 vo de Strizzi und Luuser:


Uns daut’s!

Dr Jänner 2016 blyybt uns wättertechnisch in sehr gueter Erinnerig – Daagesheggschtwärt vo bis zue 14°C! D’Lyt uff dr Strooss het me in kurze T-Shirts gsee ummelaufe – d’Pflanze hän s Gfyyl vom Friehlig in sich drait und me het gmaint, d’Blietezyt stoot voor dr Diire… und daas scho im Jänner?! Doo isch doch ebbis nit esoo, wie’s eigentligg sott syy…

Daas hän sich au unseri Strizzi dänggt und hän in däm Joor d’Klimaerwäärmig als Sujet gnoo. Bassender und aktueller als es im vergangene Joor gsy isch, kaa’s gaar nit syy. Im Summer hämmer gschwitzt und in dr Betonwieschti vo dr Stadt verzwyyflet nach eme Fläggli Schatte gsuecht. Jeedi Meegligkait sich ab z’kiehle het me miesse woornää und dr Rhy het e Menscheufflauf miesse erdraage, wie woorschynligg sälte in siinere Gschicht. In de Alpe schwinde d’Gletscher und Aafangs Februar muesch dr Schnee go sueche – uns daut’s!

Am Daag voor em Morgestraich het me denn aber doch no gmerggt, ass es eigentligg immer no Winter isch – es het gräägnet und isch doch relativ früsch gsy…Am halber finfi hän sich d’Strizzi und dr Stamm im Hoof vo dr Schuelzaanklinik droffe und sin gspannt gsy, wie d’Ladäärne an dr Fasnacht 2016 wird ussgseh. Dr Daniel Zeltner het wiider emool e Maischterwärgg aanegleggt und sich kritisch, aber au uff e humoorvolli Art däm Sujet aagnoo! Nach em traditionelle Marsch mit em Stamm und dr Alte Garde vom Hotel Basel uss,  hän d’Strizzi ihri Ladäärne uff e Münschterplatz brocht und jeedes Kind isch nach de siibeni in siini Richtig haimwärts abmarschiert – fir e letschti Mütze voll Schloof…

Dr Morgestraich isch eso gsy, wie me sich daas au voorstellt – kalt und drogge. Punggt vieri isch die ganzi Sans Gêne vo dr Rittergas uss Richtig Falggnerstrooss pilgeret und het dr Aafang vo dr Fasnacht zelebriert. Bis am Viertel vor siibeni am Moorge sin d’Strizzi unterwägs gsy und hän dr Morgestraich voll kenne usskoschte. Drnoo sin alli z’fryyde haim um villicht noonemool e paar Minute Schloof z’verwütsche…

Am Mäntig Nomidaag hän sich d’Strizzi & Luuser in dr Freye Strooss voor em Esprit droffe und hän sich ab de zää ab zwai uff e Cortège gmacht. Voor em Esprit het me pfyffendi Daucher aadroffe wo mit em Schnorchel nach Luft gschnabbt hän. Wyters isch me uff drummelndi Skifaarer gstosse wo vergääbes nach em Schnee und ere schwarze Pischte gsuecht hän (do wurd eigentligg nuur dr Spaalebärg in Froog koo). D‘Iisbääre und d’Eskimos sin uss em Schwitze gaar nimmi uusekoo und hän seenliggscht druff blange, ändligg wiider emool Schnee z’gseh… Scho vo wytem springt e Figur ins Aug, wo fir all daas Schwitze verantwortligg isch – unseri Blätzlibajass-Sunne. E herrligg Bild hän unseri Strizzi wiider abgää und zuedäm e kritischs und uns alli bedräffends Sujet ussgspyylt. Bi guetem Wätter (nit sunnig, nit warm, nit räägnerisch) hän si denn dr Cortège absolviert, sin im Manor Restaurant go z’Vieri nää und am friehe Oobe denn im Pfaue go z’Nacht ässe.

Au am zweite Cortège-Nomidaag isch es doch relativ früsch gsy und d’Strizzi und Luuser sin am halber zwei uff d’Route gange. Bis zem z’Nachtässe isch alles glych gsy wie am Mäntig, aber drnoo isch dr Stress erscht loosgange. Kurz nach em Nachtässe im Pfaue sin d’Strizzi ins Theater pilgeret und hän deert dr obligati Uffdritt bim Schnitzelbangg-Oobe kaa. E super Blattform d’Strizzi kenne z’präsentiere und e toll organisierte Oobe würdig derfe ii z’lyte! Drnoo isch es Richtig Heuwoog gange fir e kurzi Pause. S Letscht Mool so richtig duureschnuufe bevoor’s denn die steili Inneri Margarethe uffe goot zem dr Stamm go ab z’hoole. Dä het sich iiber dä Bsuech ryysig gfreut! Aaschliessend het dr Stamm d’Strizzi und Luuser in d’Mitti gno und alli zämme sin pfyffend und drummelnd Richtig Falggnerstrooss gloffe. Deert het’s dr traditionelli Gotti- und Göttihalt gää und alli Strizzi & Luuser sin vommene Stammmitglied zem ebbis Dringge iiglaade worde. Nach dääre Stärgigg isch die Alti Garde drzue gstosse und zämme sin mir zer Schiffländi pilgeret, wo sich unseri Wääg au scho wiider drennt hän. Kurz nach de elfi z’Oobe hän sich alli Strizzi & Luuser um d’Ladäärne versammlet und sin mental noonemool die drey vergangene Dääg duuregange.

E härzligg Danggerscheen gilt all dääne Persoone, wo sich im letschte Joor fir d’Strizzi ins Zyyg gleggt hän. Alle vooraa mecht y dr Isabelle Gutzwiller und ihrne beide Hälfer – dr Isabelle Bätscher und em Fabian Wildisen – fir Ihri glaischteti Arbet als Sujetkommission dangge. Fääle derfe bi däm Dangg nadirligg uff kai Fall d’Beglaiter, wo iiri Uffgoob gwoont routiniert und souverän gmaischteret hän. Au de Instruggdoore sin mir zue grossem Dangg verpflichtet –  hän sie sich doch unterem Joor mächtig ins Zyyg gleggt, ass es au am Stroosserand zem zueloose Freud beraitet het!

 

Daniel Rubin

                                                                                                                      Strizzi-Obmaa